Gruvvobarggijs dátáteknologijaj – 100 jahkásasj gruvvohiståvrrå Ájluovtas Divtasvuonan.
Manen la duv mobiltelefåvnnå/giehtatelefåvnnå nav unne vaj alkket sjiehttá båksåsålbbåj? Manen li dátámásjijna unnum åvdep ájgij stuorra másjijnajs ma ålles siejnev dievddin, dálásj másjijnajda ma asskáj sjiehtti. Gåktu gis dá vájkkudi oabme gruvvohiståvrråj? Oasev dájs gatjálvisájs vásstet allateknologijaviddnudahka Norwegian Crystallites tjoahkkebájken Ájluovtan Divtasvuonan. Dát histåvrrå álgij 100 jahke dássta åvddål!

Gå svænskka Radmann álagadij gruvvodåjmav Ájluovtan 1908 ettjin aktak diede makkár vájkkudusá dassta sjaddin Ájluovta sebrudahkaj 100 jage maŋŋela, ja ålles værálda dátáteknologijaj. Radmann dagáj lájggosåbadusáv ednamæjgádijn Ellingsenijn ja mávsij kr 0,25 juohkka tånnas kvársas ja kr 0,75 juohkka tånnas feltspáhtas. Vuostasj gruvvov nabddin Jennygruvvon, ja látte ja sáme oadtjun bargov gruvvon. Dát sjattaj álggon industrijaviddnudahkaj mij jagen 2008-100 jahke maŋŋela tjadná Ájluovtav globálalasj allateknologijaj.

Jårggålime sámegiellaj: Sigmund Johnsen